Shabangu: Ek's g'n Zuma se vriend
2011-06-17 13:38
Pretoria – Die eiendomsmagnaat Roux Shabangu het Vrydag ontken dat hy 'n vriend van pres. Jacob Zuma is en gesê die departement van openbare werke het hóm genader oor 'n omstrede huurkontrak.
Shabangu het op 'n mediakonferensie in Irene, Pretoria, gesê 'n prokureur wat 'n brief aan die Sunday Times gestuur het waarin daar beweer is dat hy Zuma se vriend is, se dienste is beëindig.
Hy verwys na die R500 miljoen huurkontrak van die Middestad-gebou in Pretoria. Shabangu het gesê hy is deur beamptes van die departement van openbare werke genader, maar het egter nie gesê wie hom genader het nie.
"Hulle is deur die vorige eienaars na ons verwys. Dit is hoe die kontrak in ons hande beland het."
Adv. Thuli Madonsela, Openbare Beskermer, het dié kontrak vroeër vanjaar fel gekritiseer.
Madonsela het die nasionale polisiekommissaris, Bheki Cele, skuldig bevind aan wanadministrasie en Gwen Mahlangu-Nkabinde, minister van openbare werke, gekritiseer omdat sy voortgegaan het met die kontrak ten spyte van regsadvies wat haar die teendeel aanraai.
Shabangu het gesê daar is 'n persepsie oor sakemanne dat "as hy swart is, moet hy staatsamptenare ken".
Hy het gesê sover dit hom aangaan, is die Middestad-ooreenkoms geldig en dat hy nie daarvoor verantwoordelik is dat die departement van openbare werke nie die regte proses gevolg het nie.
Volg Nuus24 op Twitter
- SAPA