Sexwale waarsku oor 'mag' van jeugliga
2011-11-14 10:14
Johannesburg – Tokyo Sexwale, minister van huisvesting, het die leierskap van die ANC gewaarsku om die mag en invloed van die afgedankte jeugliga-president, Julius Malema, en sy uitvoerende komitee te onderskat nie.
Sexwale het gesê die voormalige ANC-president Alfred Xuma is uit die kussings gelig omdat hy geweier het om na die jeugliga te luister, het The Times berig.
Xuma was tussen 1940 en 1949 president van die ANC, maar is dié posisie kwyt omdat hy geweier het om die jeugliga se voorstel vir militante aksie te ondersteun. Nelson Mandela was destyds die leier van die jeugliga.
Hy is vervang deur James Moroka wat ure voor sy verkiesing by die party aangesluit het.
Sexwale, wat vir Malema getuig het tydens sy tugverhoor, het op 'n gala-ete in die Oos-Kaap gepraat.
Hy het gewaarsku dat niemand 'n herverkiesing tot 'n posisie in die party verseker is nie.
"Daar is geen permanente posisie in die ANC nie. Jy dien omdat die mense so sê," het Sexwale gewaarsku voor hy gevra het vir kalmte en die jeugliga aangeraai het om nie die ANC te konfronteer oor die skorsing van sy leiers nie.
Sexwale het dié waarskuwing gemaak terwyl Malema en sy uitvoerende komitee planne beraam om die "swaar" skorsings wat verlede week deur die ANC opgelê is, om te keer.
Die ANC se nasionale tugkomitee het verlede week aangekondig dat Malema sy pos as leier van die jeugliga moet ontruim ná hy tot effektief vyf jaar geskors is.
Sexwale het 'n beroep op die jeugliga gedoen om die besluite van die tugkomitee te aanvaar – nes Xuma sy verwydering aanvaar het.
Die jeugliga wil volgens berigte hê Adj.pres. Kgalema Motlanthe moet by Zuma oorneem en Fikile Mbalula, minister van sport, moet Gwede Mantashe, sekretaris-generaal, vervang.
– Volg Nuus24 op Twitter
- SAPA