Sexwale: Ek het nie Malema ondersteun
2011-11-25 10:08
Kaapstad – Tokyo Sexwale, minister van huisvesting, sê hy het nie voor die ANC se tugkomitee verskyn om Julius Malema te ondersteun nie, maar om die beginsels waarop die party se grondwet rus, te verdedig, het die Cape Times Vrydag berig.
Sexwale het aan die Vereniging van Buitelandse Verslaggewers van Suid-Afrika (FCA) in Johannesburg gesê die nuushooftrekke wat gesê het "Tokyo steun Malema" was misleidend.
"Mense het aan my gesê: 'Tokyo, jy't jou kanse om president te word, vernietig'," het Sexwale in verwysing na sy getuienis aan die ANC se tugkomitee gesê.
"Ek het nie geweet so baie mense verwag dat ek president word nie, dalk lyk ek soos presidensiële materiaal."
Sexwale het gesê hy hoef nie president te wees om die mense te dien nie, hy kan dit doen terwyl hy enige pos beklee.
Hy het egter geweier om besonderhede oor sy getuienis voor die tugkomitee bekend te maak. Sexwale het gesê hy glo die ANC se grondwet is nie heeltemal in ag geneem in die wyse waarop die dissiplinêre aanklagte teen die leiers van die ANC-jeugliga gebring is nie.
Al wat hy wou sien was regverdigheid in die ANC se dissiplinêre proses.
Op die vraag of hy teen pres. Jacob Zuma of enige ander kandidaat sal staan indien hy as president genomineer word, het Sexwale gesê hy sal versigtig oor die nominasie sowel as die motief daarvoor dink.
– Volg Nuus24 op Twitter
- SAPA
