Sewe vas vir bedrog
2012-01-20 21:41
Johannesburg – Vier vroue en drie mans is in hegtenis geneem nadat hulle vals dokumente gebruik het om meubels in verskeie dele van Gauteng te koop, het die polisie Vrydag gesê.
Hulle het een van die mans Donderdagaand by ‘n huis in Soweto vasgetrek, het lt. kol. Katlego Mogale gesê.
“Hy het die ander man wat by ‘n huis in Bramley, in die noorde van Johannesburg, gevind is, uitgewys,” het sy gesê.
“Die polisie het by die tweede man se huis beslag gelê op 37 identiteitsdokumente, 145 bankkaarte, verskeie salarisstrokies en SIM-kaarte van verskillende netwerke.”
Die ander vyf mense is in ander dele van die provinsie in hegtenis geneem.
Mogale sê sewe sake van bedrog is by Brixton, Dobsonville, Kliptown en Roodepoort-polisiestasies oopgemaak in die afgelope paar weke.
Diegene wat in hegtenis geneem is, is tussen die ouderdomme van 29 en 59 en sal binnekort in die hof verskyn.
– Volg Nuus24 op Twitter
- SAPA