Sewe vas vir Klerksdorp-rooftog
2011-08-16 19:56
Johannesburg – Sewe mans is in hegtenis nadat hulle na bewering Dinsdagoggend ‘n onderneming in Klerksdorp van selfone en kontant beroof het, het die polisie in Noordwes gesê.
Volgens brig. Thulane Ngubani het vier mans die MTN-winkel in die Game-winkelsentrum omstreeks 09:00 binnegegaan, terwyl nog vyf mans buite gewag het.
“Die mans het na bewering die werknemers gedreig en die winkel van selfone en ‘n onbekende hoeveelheid kontant beroof.”
Ná die rooftog het die mans, wat vermoedelik van Hillbrow in Johannesburg afkomstig is, in twee motors met Gauteng-nommerplate gevlug. Die polisie het hulle agternagesit en die motors afgetrek op die pad tussen Potchefstroom en Viljoenskroon.
Die mans het weggehardloop en in die lang gras weggekruip. Sewe van hulle is met behulp van ‘n polisiehelikopter vasgetrek.
Selfone ter waarde van sowat R500 000 is teruggevind.
Die mans sal na verwagting Donderdag in die Klerksdorp-landdroshof verskyn.
- Volg Nuus24 op Twitter
- SAPA