Sewe vas ná skietery in Alberton

2012-11-25 09:58

Johannesburg – Sewe mans is in hegtenis geneem nadat ‘n skietery tussen polisiebeamptes en rowers in Leondale, Alberton, uitgebreek het, het die polisie gesê.

Lt.kol. Katlego Mogale, polisiewoordvoerder, sê die rowers het personeellede by ‘n winkel met vuurwapens aangehou terwyl hulle kontant gesteel het.

Hy sê die polisie, metropolisie en veiligheidswagte is na die toneel van die gewapende roof ontbied.

Die polisie het 15 rowers by die toneel voorgekeer toe die skietery ontstaan het.

Een van die rowers is in die skietery in sy been en maag gewond.

Die ander rowers het op die vlug geslaan. Ses van hulle is deur die polisie aangekeer.

“Twee van die verdagtes is in hegtenis geneem nadat hulle in ‘n hondehok in die gebied weggekruip het,” het supt. Wayne Minnaar van die metropolisie gesê.

Die beseerde rower is steeds in die hospitaal onder polisiebeamptes se toesig.

Die polisie het beslag gelê op gesteelde geld en vyf onwettige vuurwapens.

Volgens die polisie sal die aangekeerdes binnekort in die hof verskyn.

Die soektog na die ander rowers duur voort.

Volg Nuus24 op Twitter  

- SAPA