Seuntjie uit vuurwarm motor gered
2009-12-19 07:36
Bloemfontein - Die driejarige seuntjie wat in ’n motor in Bloemfontein toegesluit was terwyl sy ma inkopies gedoen het, was minstens ’n halfuur lank in bloedige hitte in die motor. Hy het geskreeu en dit het gelyk of sy neus bloei.
Omstanders het die histeriese seuntjie Woensdag kort voor 13:00 in die motor op die parkeergebied van die Hyperama gekry en die polisie ontbied. In ’n aangrensende motor was dit toe 35 °C.
Die polisie het gister ’n navraag-leêr geopen na aanleiding van die voorval. As daar genoegsame gronde vir ’n klag is, sal ’n dossier aangelê word.
Insp. Richard Botha van die eenheid teen gesinsgeweld, seksuele oortredings en kindermishandeling is tans besig om die saak te ondersoek.
“Indien bevind word dat daar genoegsame gronde is vir vervolging, sal ’n dossier geopen word in gevolge die Kinderbeskermingswet,” het hy gesê.
Botha is besig om deur middel van ooggetuies en videomateriaal die identiteit van die vrou vas te stel. Hy kan dit doen as die registrasienommer van die wit Volkswagen Citi Golf gekry is.
Verklarings sal ook van die twee polisiebeamptes bekom word wat vinnig op die toneel was.
Dossie Theron, ’n ooggetuie, het gesê die seuntjie moes minstes ’n halfuur in die motor toegesluit gewees het. Vermoedelik het sy ma hom in die motor gelos omdat hy geslaap het.
“Die seuntjie het op die sitplek gestaan en skreeu en skreeu en skreeu. Hy het ’n speelgoedkarretjie in sy hand vasgeklem. Hy was rooi in sy gesig en dit het gelyk of sy neusie begin bloei.
“Ek het probeer om hom so ver te kry om die slotknippie op te trek, maar hy is te klein. Ek het daaraan gedink om die ruit te breek toe die polisie daar aankom. Die seuntjie was papnat gesweet toe hy uitgehaal is.”
Die ma het ook toe daar aangekom en toe sy gekonfronteer is, het sy gevra of Theron wil voorgee dat sy “’n slegte ma is”.
“Ek het vir haar gesê sy moet net die kind iets gee om te drink.”
Sy het wel gesê sy is bereid om ’n verklaring af te lê indien ’n klag ingedien sou word.
- Die Burger
