Seun vas vir pa se moord

2012-07-09 17:34

Johannesburg – ‘n Vier-en-twintigjarige man is in hegtenis geneem in verband met die moord op sy pa ná ‘n rusie oor kos, het die polisie in die Wes-Kaap Maandag gesê.

Die voorval het Vrydagaand ná 22:00 plaasgevind, het kapt. Malcolm Pojie gesê.

“Die motief vir die moord kan moontlik ‘n rusie wees wat die verdagte en sy pa vroeër dieselfde aand oor kos gehad het,” het Pojie gesê.

Volgens Potjie het Hans Olckers (49) en sy vrou gereed gemaak om bed toe te gaan in hul huis in Riemvasmaak, Bongolethu.

”Die seun het hom na bewering genader terwyl hy langs sy vrou op die bed gesit het en hy het hom met ‘n mes in die bors gesteek,” het Pojie gesê.

Olckers het later aan die steekwond beswyk.

Die 24-jarige man sou na verwagting Maandag in die Oudtshoorn-landdroshof verskyn.

Die ondersoek duur voort.

– Volg Nuus24 op Twitter

 

- SAPA