Seun vas ná hy vuurwapen skool toe neem

2012-11-15 14:28

Johannesburg – 'n Seun (14) is in Lotus Gardens, Pretoria-Wes, in hegtenis geneem nadat 'n ongelisensieerde vuurwapen in sy besit gevind is, het die polisie in Gauteng Donderdag gesê.

Die tiener is Woensdagaand in hegtenis geneem en is in die sorg van sy ouers vrygelaat, het kapt. Pinky Tsinyane gesê.

"Die seun het na bewering 'n vuurwapen na 'n hoërskool in die gebied geneem. Iemand het die vuurwapen by hom gesien en die polisie is in kennis gestel."

Die polisie het die seun se ouerhuis deursoek en 'n semi- outomatiese pistool onder die bed gevind. Toe hy ondervra is oor dié vuurwapen, het hy gesê dit behoort aan sy oom. Die oom het ontken dat dit sy vuurwapen is.

Die seun sal Vrydag op aanklag van die onwettige besit van 'n vuurwapen in die Pretoria-landdroshof verskyn.

– Volg Nuus24 op Twitter

- SAPA