Seun van ANC-hoë gooi naam in hoed vir stryd teen Malema
2010-06-19 06:24
Die Burger
Kaapstad - Die groeiende interne teenstand in die ANC-jeugliga teen Julius Malema, sy omstrede leier, is besig om spoed op te tel.
Te midde van ’n rits bewerings oor ’n gekonkel met uitslae van provinsiale leiersverkiesings het Serofo Motshekga, seun van die
ANC-hoofsweep, dr. Mathole Motshekga, ’n landwye veldtog van stapel gestuur om Malema uit te daag. Die minister van basiese onderwys, Angie Motshekga, is sy stiefma.
Dít ondanks die skerp en openbare kritiek van sy ouers dat Malema vir hulle soos ’n seun is en hulle hul van hul seun se uitlatings distansieer.
Hy sluit aan by Andile Lungisa, Malema se adjunk, wat reeds aangedui het hy sal sy naam ook in die hoed gooi wanneer die jeugliga aanstaande jaar byeenkom om leiers aan te wys.
Motshekga was vandeesweek in die Vrystaat besig om jeugliga-takke te bearbei en die saak vir verandering te bepleit.
Sy kamerade meen hy beskik oor beduidende steun in minstens drie provinsies – die Vrystaat, Noord-Kaap en Noordwes – om ’n stewige uitdaging aan Malema en Lungisa te rig.
Hierbenewens is dit bekend dat invloedryke jeugliga-takke in Gauteng ernstige vrae vra oor Malema se bestuurstyl, wat ook in Motshekga en Lungisa se guns kan tel.
“Sy leierskaptyl was aanvanklik dienstig vir die tipe rol wat baie wou gehad het die jeugliga moet speel – luid en onbeskof – maar dit is nou besig om baie te vervreem van die jeugliga én die ANC,” het ’n Motshekga-organiseerder gesê.
“Malema tree soos ’n keiser op. Dit is besig om tot groot tweespalt in die organisasie te lei. Kyk na wat op die onlangse kongres in die Oos-Kaap gebeur het: Malema het dit nietig verklaar toe die leiers wat daar verkies is nie dié was wat hy voorgestaan het nie.”
Die ontbinding van die Oos-Kaapse verkose leierskorps het gevolg op soortgelyke gebeure in Noordwes en Limpopo, waar Malema vroeër as provinsiale sekretaris gedien het.
Die Vrystaat, Wes-Kaap en Mpumalanga se provinsiale leiersverkiesings kom volgende aan die beurt, hoewel die datums nog nie vasgestel is nie.
Volg Nuus24 op Twitter
- Die Burger