Seun tref gewonde pa lewend aan
2011-02-21 09:20
Bloemfontein - Die vermoorde Vrystaatse boer Helgard Muller het nog asemgehaal toe sy jongste seun, Helgard jr., ná die aanval waarin sy pa in die kop geskiet is, op hom afgekom het.
Muller, van die plaas Mara in die Frankfort-distrik, is die nuutste slagoffer van die vlaag plaasmoorde in Suid-Afrika.
Die polisie en ambulansdiens is ná die aanval ontbied, maar Muller is op pad na ’n hospitaal in Vereeniging dood. Dit was vier dae nadat hy verjaar het.
Volksblad het Sondag met die seun oor die nagmerrie-ervaring gepraat.
Muller jr. sê sy ma, Marietjie, wat in ’n rolstoel is, en huishulp is Saterdagoggend deur twee rowers in die plaashuis met skoenveters vasgebind en in verskillende kamers toegemaak. Hul monde was toegeplak.
“Hulle (die rowers) het my ma vir die kluis se sleutel gevra en geld gesoek.”
Kapt. Harry Nagel, polisiewoordvoerder, sê die mans was met ’n vuurwapen en stok gewapen.
Muller sr. het vroeër die oggend die huis verlaat om na sy vee te gaan kyk en het sowat twee uur later teruggekeer.
Die rowers het hom ingewag en geskiet voordat hulle in sy se Isuzu-bakkie gevlug het. Hulle het R700 en selfone gebuit.
Die huishulp het daarin geslaag om haarself en mev. Muller los te kry.
Muller jr. sê hy het ’n spilpunt gaan stop en toe hy naby die huis was, het die huishulp vir hom geskree.
Hy het sy pa in die gang in die huis gekry.
Vrystaat Landbou (VL) se gebeurlikheidsplan is in werking gestel en boere, die polisie en VL se intelligensiediens het saamgewerk om die vermeende moordenaars vas te trek.
Die bakkie is verlate op ’n grondpad naby Frankfort gevind en twee mans van 19 en 32, albei van Oranjeville, asook ’n 25-jarige vrou van Frankfort is in hegtenis geneem. Die polisie het die rewolwerwaarmee Muller vermoedelik geskiet is in die jong vrou se huis gekry.
“Ek het nie woorde om te beskryf hoe ek voel nie,” het Muller jr. Sondag aangedaan gesê.
“Jy gaan nie ’n beter ou kry nie. Hy het nie verby een ou gestap sonder om hom te groet nie.”
Volgens Muller jr. is daar niks wat sy pa nie vir sy kinders sou doen nie. Hy was ook gelief onder sy werkers, wat baie geskok oor sy dood is.
Nagel sê die vermeende moordenaars sal vandag in die landdroshof op Frankfort verskyn.
Begrafnisreëlings is nog nie gefinaliseer nie.
- Volksblad