Seun sterf, boetie beseer ná motor teen paal bots
2013-01-20 14:44
Johannesburg – 'n Vierjarige seun is dood en sy bababoetie is ernstig beseer nadat die motor waarin hulle gery het, teen 'n paal in Boksburg gebots het, het paramedici gesê.
Vanessa Jackson, woordvoerder van ER24, het gesê 'n Toyota Auris het in Rondebultweg in die rigting van die Boksburgse middestad gery toe die ongeluk omstreeks 10:15 plaasgevind het.
Jackson het gesê die kinders se ma, wat die voertuig bestuur het, het vermoedelik in Cometstraat beheer oor die motor verloor en teen die paal gebots.
Die 27-jarige vrou het ligte beserings opgedoen. Haar vierjarige seun is op die toneel dood en sy 20 maande oue broer het sy been gebreek en is na 'n hospitaal in Benoni geneem.
"Hy is intussen na die Union-hospitaal in Alberton oorgeplaas, waar hy in 'n bestendige, maar ernstige toestand is," het Jackson gesê.
Geen ander voertuie was in die ongeluk betrokke nie.
– Volg Nuus24 op Twitter
- SAPA
