Seun steek boetie dood oor speletjie

2012-10-06 15:03

Johannesburg – 'n Minderjarige is in hegtenis geneem ná hy sy jonger boetie oor 'n speletjie doodgesteek het, het die polisie in die Noordwes Saterdag gesê.

"'n Rusie het na bewering uitgebreek terwyl die twee broers met dobbelstene gespeel het, en die verdagte het kwaad geraak en die slagoffer drie keer gesteek," het Amanda Funani, 'n woordvoerder, gesê.

Die 17-jarige het 'n mes uitgepluk en sy broer bo sy regteroog, in sy bors en aan die linkerkant van sy ribbes gesteek, het Funani gesê.

Die seun is na die Swartruggens-hospitaal geneem, waar hy dood is.

Die ouer broer is in die sorg van maatskaplike werkers terwyl die Swartruggens-polisie se ondersoek voortduur, het sy gesê.

– Volg Nuus24 op Twitter.

- SAPA