Seun stabiel ná hond hom in gesig byt
2012-03-07 09:08
Kaapstad – Die driejarige seuntjie Lincoln Nimmerhout van Belhar wat Sondagoggend deur ’n Rottweiler gebyt is, is steeds in ’n stabiele toestand.
Hy het Dinsdag ’n operasie aan sy neus en onderkaak in die Rooi Kruis-Kinderhospitaal ondergaan.
Uzent Links, sy stiefpa, het Dinsdag gesê hy het die Lincoln na die doktor gebring nadat die hond hom buite dieHoërskool Perseverance in Belhar aangeval het.
Volgens Links het die hond Lincoln skielik begin byt.
“Ek het probeer om die hond van hom af te kry, maar hy wou nie los nie. Dit het 15 minute geduur voor die hond hom gelos het.”
Hy het gesê hy het die hond ook met klippe bestook, maar die hond het die kind aanhoudend in die gesig gebyt.
“Ek het selfs probeer om die hond te kry om mý te byt, maar hy het net vir Lincoln gegaan. Selfs van die mense in die gemeenskap het die hond ook met klippe bestook, maar hy wou nog steeds nie los nie. Die hond het Lincoln rondgeskud soos hy hom gebyt het.”
Lamees Martin, woordvoerder van Die Kaap de Goede Hoop se Dierebeskermingsvereniging (DBV), het gesê die hond is op versoek van die eienaar van kant gemaak.
Volgens haar is die hond as ’n waghond by die skool gebruik. Die eienaars het egter nie ’n lisensie gehad om die hond daarvoor te gebruik nie.
Die kleuter se ma, Cerenice Nimmerhout, het gesê sy is bly die hond is van kant gemaak. “Ek is stukkend en seer oor wat met my kind gebeur het. Hy het erge skade aan sy gesig opgedoen,” het sy gesê.
Volg Nuus24 op Twitter
- Die Burger
