Seun skiet meisie in been
2012-01-11 07:01
Theunissen – ’n Skoolseun (13) is Dinsdagmiddag hier by sy oupa en sy oom se bywonershuis op ’n plaas deur die polisie in hegtenis geneem nadat die seun glo ’n meisie met dié oom se .22-geweer in die been geskiet het.
Die koeël het die regterbobeen van Nomthandazo Shirley Maxhaka (15) deurboor.
’n Woordewisseling ná ’n spelery by ’n dam op die plaas het glo die skietery voorafgegaan.
Die seun, wat deur sy oupa en oom versorg word, se pa is dood en sy ma bly in die Kaap.
’n Klag van poging tot moord word ondersoek.
Die seun is Dinsdagmiddag laat na die polisiekantoor op Theunissen gebring waar hy aangekla en daarna onder die sorg van sy oom en oupa vrygelaat is.
Kapt. Stephen Thakeng, polisiewoordvoerder, sê die motief vir die skietery en wat dit vooraf gegaan het, is deel van die polisie se ondersoek.
Met Volksblad se aankoms op die plaas by die Sandvet-landbousentrum op die Port Allenpad, het tientalle ander kinders om Maxhaka saamgedrom terwyl sy deur paramedici van die provinsiale ambulansdiens behandel is.
Die sentrum is oorkant die Vierhoek-plaasskool waar Maxhaka ’n leerling is. Die seun is ’n leerling aan die Laerskool Nelsdrif tussen Welkom en Theunissen.
Een van die omstanders, Mbuliswahe Tsietsi (18), het gesê die kinders het almal saam gespeel.
Hy sê daar is ’n winkel op die plaas waar al die kinders van die omgewing inkopies doen.
Volksblad verneem ’n woordewisseling het ontstaan, waarna van die ander kinders glo gedreig het om die seun met ’n skokstok te skok.
Hy is glo na die huis waar hy die geweer gaan haal het. Maxhaka het die ander kinders toe glo aangepor om hom te skok, waarna hy na bewering ’n skoot in die grond afgevuur en die opslagkoeël haar getref het.
Sy is in die Bongani-hospitaal in Welkom opgeneem.
Volg Nuus24 op Twittter
- Volksblad
