Seun skiet glo sy pa dood in Stilbaai
2009-12-04 07:15
Eugene Gunning
George - Dit gons in Stilbaai nadat ’n 18-jarige tiener na bewering sy pa gister kort ná middernag doodgeskiet het.
Die seun, Jacobus van Zyl, het gistermiddag in die landdroshof in Albertinia verskyn op aanklag van moord.
Die saak is tot 15 Januarie uitgestel. Hy is ondertussen in huisarres.
Na bewering het Van Zyl kort ná middernag sy 39-jarige pa, Koos van Zyl, op die plaas Grootfontein naby die Goukou-rivier in die omgewing van Stilbaai geskiet.
Die Burger het gistermiddag betroubaar verneem dat hy glo onlangs gedreig het om sy pa te skiet. Dié tragiese voorval, wat die gemeenskap diep geruk het, het glo ’n lang aanloop van groot onenigheid in die familie.
Die seun is deur sy oupa en ouma grootgemaak. Sy oupa is ’n paar jaar gelede oorlede.
Die polisie het gistermiddag in ’n verklaring gesê die seun is op die toneel in hegtenis geneem.
Kapt. Bernadine Steyn, ’n Suid-Kaapse polisiewoordvoerder, het gesê die seun se pa het na bewering in ’n stoel in die sitkamer van die huis geslaap toe die voorval plaasgevind het.
Na bewering was Van Zyl se vrou, Vikie, in die badkamer en het die egpaar se 14-jarige dogter, Rita, in haar kamer geslaap.
Van Zyl het op die toneel aan aan ’n kopwond beswyk.
- Die Burger