Seun mág eksamen aflê ná 'seks' in klaskamer

2012-11-13 09:17

Johannesburg – Die hooggeregshof in Pretoria het 'n dringende interdik toegestaan om 'n seun toe te laat om sy eksamen af te lê nadat hy geskors is, het die Sowetan berig.

Die 17-jarige gr.10-leerder is uit die Blue Hills-kollege in Midrand, Johannesburg, geskors nadat hy glo in Julie in 'n klaskamer seks gehad het met 'n 19-jarige matriekleerder. Vier leerders is na bewering in Julie betrap terwyl hulle in die klaskamer seks gehad het.

Drie van dié leerders is geskors. Die matriekleerder is geskors en toegelaat om haar eksamen af te lê.

"Sy skryf haar eksamen terwyl my seun geskors is, ten spyte daarvan dat die seks konsensueel was," het die seun se pa aan die koerant gesê.

Die hof het Vrydag beslis dat die seun toegelaat moet word om sy eksamen af te lê.
     
– Volg Nuus24 op Twitter

- SAPA