Seun ken lyk van boer in gat uit
2011-06-09 09:12
"’n Mens moet vergewe, al voel jy nie so nie,” het die seun van die vermoorde Frank Gaudin, ’n boer van buite Randfontein wie se lyk in ’n gat gevind is, gesê.
Frank Gaudin jr., ’n voorligtingsonderwyser van Katanning, Wes-Australië, het sy pa Dinsdag in die Roodepoort-lykhuis op ’n digitale foto uitgeken wat van die lyk geneem is.
“Die brutaliteit van die daad is onmenslik,” het hy Woensdag gesê.
Volgens hom was daar sny- en kneuswonde aan sy pa se bolyf, oor sy gesig en kop.
“Ek het nie taal wat sterk genoeg is om te sê hoe brutaal dit gelyk het nie.”
Gaudin jr. het gesê die gevoel om te vergewe is dalk nie daar nie, “maar jy moet sê jy vergewe ... al voel jy nie so nie”.
Hy het dié metode van vergifnis by ’n geloofsvriend geleer, het hy gesê.
Dit was nie misdaad wat Gaudin jr. na Australië laat emigreer het nie, maar sy keuse om sy lewenstyl te verander.
“In dié stadium is die toekoms van sy pa se plaas onseker.
“Die mense hier weet nie of hulle môre of oormôre meer werk hier het nie. Dit is vir wie ek jammer is.”
Gaudin sr. se lyk is Saterdagmiddag ná ’n groot soektog versteek in ’n gat op die plaas gevind. Sy vrou, Sandra (56), is in Desember 2008 op dieselfde plaas, African Artifacts Farm, vermoor deur twee Mosambiekse broers waarvan een reeds lewenslank tronk toe gestuur is.
Thomas Walters, LPW en die DA se provinsiale woordvoerder oor landbou en landelike ontwikkeling, het gesê ’n patroon van gebrekkige veiligheid in landelike gebiede is al hoe meer sigbaar. “Boere en hul werknemers loop statisties gesproke veel groter risiko’s as enige ander Suid-Afrikaners om geweld van misdadigers te beleef. Hopelik sal mnr. Gaudin se afsterwe verskerpte optrede en vergrote hulpbronne vir landelike veiligheid beteken,” het Walters vandeesweek gesê.
Gaudin sr. se begrafnisreëlings is nog nie gefinaliseer nie.
Volg Nuus24 op Twitter
- Beeld