Seun gebroke ná moord op gesin
2012-04-10 07:00
Griekwastad – “Die lig is uit klein Don se oë, hoewel hy kalm voorkom. Hy het gehuil toe die polisie verduidelik wat gebeur in ’n lykskouing.”
Só sê Marianna Smith, tante van die jong Don Steenkamp (15), wie se ouers, Deon (44) en Christelle Steenkamp (43), en sy suster, Marthella (14), op Goeie Vrydag in hul plaashuis sowat 9 km buite die dorp doodgeskiet is.
Don is die enigste oorlewende van die treurspel wat mense oor die land heen geruk het.
Hy het skote gehoor terwyl hy in die pakskuur buite besig was en het op sy gesinslede se lyke in die TV-kamer afgekom.
Die vermoorde mnr. Steenkamp se twee susters, Smith van Stellenbosch en Elbeth Vermaak van Pretoria, het die plaas Naauwhoek, waar die treurspel hom afgespeel het, Maandag saam met jong Don en hul bejaarde ouers, Don (79) en Bettie Steenkamp (85), besoek.
Die polisie het Maandag verklarings van plaaswerkers afgeneem.
Kol. Hendrik Swart, die woordvoerder van die polisie, sê hulle het nog nie ’n verdagte geïdentifiseer nie. “Daarom is daar nie ’n grootskaalse soektog nie. Daar word gekonsentreer op forensiese leidrade en ondervraging van getuies.
“As daar mense is met enige waardevolle inligting, bel eerste die polisie. Vertel vir ons, nie ander mense nie.
“Die lykskouings word Woensdag gehou. Ons is nog onseker of dit in Kimberley of Bloemfontein sal wees,” sê Swart.
Steenkamp se susters sê die polisie is vaag met hul antwoorde.
“Ons wil ook nie gis nie. Miskien was dit jaloesie, maar ek wil niks meer sê nie. Dit bly steeds ondenkbaar,” sê Smith.
“Ek is egter baie bekommerd oor my ma. Sy het nog glad nie gehuil nie. Dit is asof sy dit nie glo nie. My pa is baie hartseer en emosioneel.
“Deon was alles vir my ma. Hy is gebore toe sy 42 was ná twee miskrame. Ek en Elbeth was mal oor ons jong boetie. Hy is agt en elf jaar jonger as ons.
“Deon was ’n vriendelike, standvastige en verstandige mens. My man, Valdon, het ná ons kuier hier in Desember gesê Deon is so wys. En kon hy die beste uit ’n viertrekvoertuig kry!
“Christelle was vreeslik hardwerkend en deeglik. Haar tuisnywerheid, Scrumptilicious, het sy lank aan beplan. Die koekieresepte is oor en oor getoets en ’n ordentlike sakeplan opgetrek.
“Hulle was fantastiese ouers vir die twee kinders. Christelle en Don het dieselfde kossmaak gehad en het nie erg aan TV-kyk gehad nie. Deon en Marthella was ook amper dieselfde mens.”
“Dit is vir almal ’n baie moeilike tyd,” sê Smith.
Die roudiens en verassing is Donderdag om 11:00 uit die NG kerk Griekwastad.
Volg Nuus24 op Twitter
- Volksblad
