Seun dood wat glo bakleiery wou keer
2010-11-08 07:18
Volksblad
Johannesburg - ’n Hoërskoolseun (18) van Westonaria aan die Wes-Rand is die naweek breindood verklaar nadat hy glo verlede week as bemiddelaar in ’n geveg buite die skoolterrein wou optree.
Louwrens Gebhardt, kaptein van die skool se eerste rugbyspan, is Saterdag omstreeks 11:00 in die private hospitaal Netcare-Krugersdorp dood nadat die masjiene wat hom aan die lewe gehou het, afgeskakel is.
Die skool se hele eerste rugbyspan was daar om hom te groet.
Louwrens het Donderdag omstreeks 13:30 ’n hou teen sy voorkop gekry toe hy glo ’n man wat ’n skoolmaat buite die skoolterrein wou slaan, probeer keer het.
Dié bakleiery was glo die nasleep van ’n geveg die vorige dag tussen twee leerlinge.
’n Volwasse man wat glo ’n noue verbintenis gehad het met een van die seuns wat by die bakleiery die vorige dag betrokke was, wou glo die ander seun slaan. Dié man, wat buite die skool gestaan en wag het, was met ’n bofbalkolf gewapen.
Toe die man die seun wou slaan, het Louwrens tussenbeide getree.
Hy is teen die voorkop getref.
Louwrens was volgens sy oom, Cobus Gebhardt, nie by die geveg betrokke nie en het oor die pad gestap om te gaan help.
“Leerlinge wat ooggetuies van die aanval was, het die onderwysers gaan roep. Sy ouers is gekontak en dié is reguit na die huisdokter. Hy was toe nog by sy positiewe,” sê sy oom.
Louwrens is op aandrang van die huisdokter na ’n hospitaal oorgeplaas. “Op pad na die hospitaal het hy sy bewussyn verloor,” sê sy oom.
Ná verskeie toetse is vasgestel hy het erge bloeding op die brein. Hy is Saterdag breindood verklaar.
“Hy was ’n fris en sprankelende seun. Sy dood laat ’n leemte in ons almal se harte,” sê sy oom.
Die familie ontken beweringe dat die voorval met rassespanning by die skool verband hou.
Benard Fischer, skoolhoof, het by navraag gesê die skool sal vandag traumaberading aan Louwrens se skoolmaats gee.
Konst. Lienkie Lefakane, polisiewoordvoerder van die Westonaria-polisiekantoor, sê ’n saak van aanranding met die doel om ernstig te beseer is aanvanklik geopen.
“Die ondersoek het uiteraard nou in ’n moordsaak verander. Ons is steeds op soek na die aanvaller. Die polisie sal die situasie by die skool dophou om enige verdere geweld wat kan voorkom, te stuit.”
- Volksblad