Seun beseer in skietery by winkelsentrum

2013-01-08 15:41

 Johannesburg – ‘n Tienerseun is Dinsdag tydens ‘n skietery by die Golden Walk-winkelsentrum in Germiston geskiet en beseer, het die polisie gesê.

Volgens ao. Andre de Jager is die 16-jarige seun beseer toe twee skote gevuur is nadat ‘n man probeer het om ‘n juwelierswinkel in die sentrum te beroof.

De Jager sê die man het die Sterns binnegegaan en oor die toonbank gespring. Hy het aangedring op juweliersware en geld.

‘n Getuie het hom gesien en het gehardloop om die sentrum se sekuriteitswagte in kennis te stel.

Die man, wat niks gesteel het nie, het  weggehardloop en twee skote gevuur.

Paramedici sê die seun is op die toneel behandel en gestabiliseer.

“Hy is na ‘n nabygeleë hospitaal geneem vir verdere mediese behandeling,” het Santi Steinmann, woordvoerder van Netcare 911, gesê.

– Volg Nuus24 op Twitter

- SAPA