Seun (5) sterf in Springs-huisbrand
2011-07-07 10:50
Johannesburg – ‘n Vyfjarige seun is dood en drie volwassenes is vir rookinaseming behandel nadat ‘n huis in Springs aan die brand geslaan het, het paramedici gesê.
Volgens Jeffrey Wicks, woordvoerder vir Netcare 911, het die huis aan die Oos-Rand van Gauteng Woensdagaand aan die brand geslaan.
Die brand het vermoedelik vanaf die kaggel versprei en ‘n groot gedeelte van die sitkamer in die huis in Wankielaan verswelg, het Wicks in ‘n verklaring gesê.
Wicks sê paramedici is ontbied nadat hulle ‘n oproep van die bure ontvang het.
Paramedici het die seun probeer bybring nadat hulle hom by die huis uitgedra het. Hy is op die toneel dood.
Sy ouers in na ‘n hospitaal geneem en hul toestand is in dié stadium nog nie bekend nie.
‘n Bejaarde vrou wat in die huis was het rook ingeasem. Twee mans wat by die huis ingehardloop het om te help, is ook vir rookinaseming behandel. Hulle is na ‘n hospitaal geneem en is in ‘n ernstige toestand.
Volg Nuus24 op Twitter.
- SAPA