Seun (3) sterf in speletjie met oom
2011-07-14 08:35
Pietermaritzburg. – Hy het die kleuter in ’n speletjie aan sy arms geswaai toe die seuntjie se kop ’n muur getref en hy gesterf het.
Uit paniek het hy die lykie in ’n kartonhouer versteek waar dit byna twee maande later eers gevind is.
Só lui die bekentenis van Simphiwe Zondi (19), aan wie ’n opgeskorte vonnis van vyf jaar tronkstraf gister in die Pietermaritzburgse landdroshof opgelê is weens die dood van Mcebisi Zondi (3). Mcebisi is sedert 26 Mei vermis.
Zondi het voor streeklanddros Paul Ableman beken hy het Mcebisi “wederregtelik en nalatig” aan die arms geswaai.
“Ek het nie bedoel om hom seer te maak nie en het heeltemal berou oor my optrede,” het hy in ’n verklaring gesê.
Volgens Zondi het sy suster Thoko hom gevra om na haar seuntjie om te sien.
“Ek het met Mcebisi gespeel deur hom aan albei arms te swaai. Dit was nie die eerste keer dat ons so gespeel het nie en ek het geweet hy hou daarvan. Ek het my greep tydens die speletjie verloor en die seun het die muur met sy kop getref en geval.”
Hy het besef Mcebisi beweeg nie en paniekerig geraak.
“Ek was so geskok oor wat ek gedoen het dat ek sy lyk in ’n kartonhouer gesit het.”
S. Ngobeni, sy regsverteenwoordiger, het by die hof om genade gepleit.
Hy het aangevoer Zondi het skuld beken en verantwoordelikheid vir sy optrede aanvaar.
“Ek vra die hof om hom nie te straf net omdat hy die lyk versteek het nie.”
Pranisha Kasool, aanklaer, het tronkstraf vir Zondi gevra. Sy het gesê hy het vir sy suster gejok.
“Hy het gesê hy het die seun vroeër gesien en toe sy hom later gevra het waar die seun is, het hy gesê hy weet nie waar hy is of wat met hom gebeur het nie.”
Die kartonhouer met Mcebisi se ontbindende lyk in is gekry in ’n kamer waar sy ma ook gewoon het.
Ableman het in sy uitspraak gesê Mcebisi se dood is tragies en ’n ongeluk. Volgens hom is tronkstraf nie gepas nie.
– Volg Nuus24 op Twitter
- Beeld