Seun 2 keer geopereer ná aanval by skool
2011-09-12 08:03
Daniëlskuil – Twee noodoperasies is in die Kimberley-hospitaalkompleks op ’n leerling in gr.10 aan die Hoërskool Kuilsville uitgevoer nadat twee broers hom na bewering buite ’n klaskamer aangerand het.
Die twee vermeende aanranders verskyn Maandag in die landdroshof op die dorp in verband met ’n klagte van poging tot moord.
’n Geskokte familielid het Sondagmiddag aan Volksblad gesê Eddison van Staden (18) het ernstige kopbeserings opgedoen toe hy glo Donderdag omstreeks 13:00 aangerand is.
Eddison, wat by sy ouma woon, is na die Kimberley-hospitaalkompleks gebring waar hy die noodoperasies ondergaan het.
Sy ma, ook van Daniëlskuil, waak by hom waar hy in die intensiewesorgeenheid verpleeg word.
Sy toestand is ernstig, maar stabiel.
’n Familielid het gevra dat Eddison se naasbestaandes se name uit vrees vir intimidasie nie bekend gemaak word nie.
Kapt. Tony Modise van die polisie sê die twee 18-jarige verdagtes verskyn vandag in die landdroshof op die dorp. Hulle is na bewering leerlinge van dieselfde skool.
Die beweerde aanranding het glo ten tyde van ’n hewige woordewisseling plaasgevind.
Modise sê in nog ’n voorval het polisieduikers die lyk van ’n 17-jarige meisie Donderdagmiddag uit die Vaalrivier by die Barkly-Wes-woonwapark gehaal.
Dit kom nadat leerlinge van die skool glo die middag in die rivier geswem het. Die swemmers het opgemerk hul maat het in die water verdwyn. Die polisie is ontbied. Haar naam is nog nie bekend gemaak nie.
Modise sê Rozanda Louw (20) van Barkly-Wes is Woensdagaand dood toe die polisie-bakkie waarin sy gery het glo op die N12-hoofweg tussen Hopetown en Belmont omgeslaan het.
’n Vrou is beseer. Die bestuurder van die bakkie, ’n polisiekonstabel, is ongedeerd.
Volg Nuus24 op Twitter.
- Volksblad