Seun slaan dood neer nadat hy bendes sien baklei
2010-11-22 09:50
Volksblad
Bultfontein – ’n Vyftienjarige seun van die dorp is dood, vermoedelik weens skok, toe hy sien hoe lede van ’n bende ’n lid van ’n ander bende met ’n mes by sy skool toetakel.
Die voorval het Vrydag, nadat die seuns eksamen geskryf het, by die Hoërskool Retholositswe gebeur.
Sers. Puleng Motsoeneng, polisiewoordvoerder, sê twee seuns, onderskeidelik 17 en 18 jaar oud, van die bende met die naam Portugese, het by die skool vir ’n lid van ’n ander bende, BTK (wat staan vir Born to Kill), gesit en wag.
Hulle is almal leerlinge van Retholositswe.
Dié 19-jarige waarvoor hulle gewag het, was nog met eksamens besig.
Nadat hy uit die eksamenlokaal gekom het, het die twee hom met messe aangeval.
Hy is indie kop en rug gesteek.
Hy is in die hospitaal behandel en reeds ontslaan.
Sy aanvallers het daarna weggehardloop en word nog deur die polisie gesoek.
’n Seun, 15, wat die hele aanval sien gebeur het, het dood neergeslaan.
Motsoeneng sê die polisie vermoed die seun is weens skok dood, maar ’n lykskouing sal gedoen word.
Volg Nuus24 op Twitter
- Volksblad