Seun (14) besny glo ses ander
2010-06-04 23:53
Kaapstad – ‘n 14-jarige seun is Vrydag in Ngqgeleni in hegtenis geneem nadat hy glo ses jeugdiges onwettig besny het, het die departement van gesondheid in die Oos-Kaap gesê.
Volgens Sizwe Kupelo staar dié seun nou verskeie aanklagte in die gesig onder die provinsie se besnydenis-wetgewing.
Die ses seuns wat besny is, was almal dieselfde ouderdom.
“Die polisie kan die seun glo verbind aan soortgelyke oortredings oor die afgelope drie jaar. Dit beteken hy het reeds begin om ander seuns te besny op die ouderdom van tien jaar oud,” het Kupelo gesê.
“Lede van die gemeenskap wat steeds aan tradisies vasklou word gevra om weer te kyk na hierdie tipe voorvalle. Hierdie is nie meer ‘n verpligte ritueel nie, maar eerder ‘n groep seuns wat doen wat hulle wil.”
Besnydenisse word tradisioneel in die winter gedoen. Sowat 11 seuns wat oor die afgelope twee dae onwettig in die provinsie besny is, is in die St. Barnabas-hospitaal opgeneem vir mediese behandeling.
Volg Nuus24 op Twitter.
- SAPA