Ses swyg oor wie Lindley-meisie geskiet het
2011-06-07 07:01
Bloemfontein - Oor wie Willemientjie Potgieter (2) van Lindley doodgeskiet het, praat hulle nie in die tronk waar hulle aangehou word nie, het een van haar en haar ouers se vermeende moordenaars Maandag in die Vrystaatse hooggeregshof getuig.
Vusi Khumalo (23) het voor regter G.F. Wright getuig hy kan nie sê wie dit gedoen het nie, want hy was nie op 1 Desember verlede jaar by toe die sneller getrek is wat die noodlottige wond in haar agterkop veroorsaak het nie.
Op ’n vraag van Chris Gerber oor wat hulle in die Grootvlei-tronk praat oor wie van Tshokolo Lelala, Telleko Seekoei en Diphapang Motaung haar geskiet het, het hy getuig dat hulle nie daaroor praat nie.
In kruisondervraging van Gerber, vir Stemmer Mofokeng, het Khumalo ook verder getuig Mofokeng is die een wat voorgestel het hulle moet Attie Potgieter beroof, omdat daar ’n kluis en geld in die plaasopstal op Tweefontein is.
As hulle geld geleen het, het Potgieter dit in die huis gaan haal en nie in die bank op die dorp gaan trek nie.
Dit was ’n plan van hulle drie plaaswerkers. Nadat die Potgieter-gesin van Durban terug was, het hulle dit met hul drie makkers in die swart woonbuurt by Lindley gaan bespreek.
In sy getuienis het hy getuig hoe Potgieter hom op 1 Desember gebel en gesê het hy sien Khumalo se swaer (Lelala) en twee ander mans in die omgewing. Khumalo moet kyk wat hulle daar soek.
Later die dag het Khumalo hulle in sy huis op die plaas gekry en gesê hulle moet die plan laat vaar, want Potgieter het hulle gesien. Seekoei en Motaung wou nie en het gesê hulle het te ver gekom om nou alles te los.
Khumalo was omstreeks 16:00 saam met Klaas Mofokeng in ’n pakhuis toe Stemmer Mofokeng daar aankom en gesê het hy het die ander drie by die plaasopstal gelos en gewys waar om te skuil. Die Potgieters het toe ook op die plaas aangekom.
Skaars drie minute later het hulle ’n skoot gehoor en kort daarna mnr. Potgieter wat skreeu. Deur ’n venster het hulle gesien hoe Lelala hom met ’n panga jaag. Seekoei het bygekom en hulle het hom gekap en gesteek.
Hy het getuig hy het gesien hoe hulle Wilna Potgieter en Willemientjie voor die huis laat sit het. Hy het haar man hoor skreeu, maar kon nie sien hoekom nie.
Hy en die ander twee het toe in dongas op die plaas gaan skuil totdat dit donker was.
Terwyl hulle daar gewag het, het nog twee skote geklap.
Daarna is hulle na die swart woonbuurt om hul deel van die buit te gaan haal.
Die volgende oggend, terug op die plaas, het hy mnr. Potgieter langs ’n draadheining by die huis sien lê.
Hy het in kruisondervraging deur adv. Lawrence Tshabalala, vir Klaas Mofokeng, getuig hy erken hy was deel van die groep wat die doel gehad het om die Potgieters te beroof, maar nie te vermoor nie.
Terwyl Potgieter aangeval is, het Potgieter sy (Khumalo se) naam geroep.
Potgieter was ’n goeie mens, het hy getuig.
Al ses ontken skuld op drie moordaanklagte en een van roof.
Adv. Jannie Botha tree vir die staat op. Adv. Pieter Nel tree vir Lelala en Seekoei op en adv. Oupa Makhene tree vir Khumalo op.
Die verhoor duur voort.
- Volksblad