Ses misdadigers vas wat Vrystaatse dorp teister

2013-02-13 17:47

Bloemfontein – Ses jeugdiges is in Viljoenskroon in hegtenis geneem in verband met 'n rits verkragtings en rooftogte in die gebied, het die polisie in die Vrystaat Woensdag gesê.

Sers. Thabo Litabe, polisiewoordvoerder, het gesê die ses is aangekeer nadat 'n vriend van een van hul slagoffers 'n man se  hoed tydens 'n uitreikveldtog in die dorp erken het.

Die polisie is in kennis gestel en die man is ondervra. Die slagoffer het later die hoed erken, waarna die man in hegtenis geneem is. Die man se beweerde makkers is Dinsdagoggend aangekeer.

Litabe het gesê 'n groep jong mans teister al die dorp sedert Desember en het verskeie misdade gepleeg. Hulle het paartjies wat in die vroeë oggendure vanaf tavernes terugkeer met messe gedreig. Hulle het dan die kêrels aangerand en die vroue na 'n nabygeleë stadion gesleep, waar hulle die vroue beurtelings verkrag en beroof het.

Die ses jeugdiges, tussen die ouderdomme van 15 en 21, het Woensdag op aanklagte van verkragting en roof in die hof verskyn.

– Volg Nuus24 op Twitter

- SAPA