Ses beseer toe vragmotor deur motors slinger
2011-05-10 20:53
Pretoria - Ses mense is ernstig beseer toe hul motors Dinsdag deur ‘n vragmotor buite beheer getref is in Potgieterstraat in Pretoria, het die Tshwane-metropolisie gesê.
Die vragmotor, wat metaalplate vervoer het, het in 10 motors vasgeploeg . Dit het twee kilometer verder eers tot ‘n stilstand gekom, het William Baloyi, woordvoerder, gesê.
Volgens Baloyi is een motor teen ‘n lamppaal geslinger, terwyl ander teen baksteenmure gedruk is of omgekeer het. Die beseerdes is na hospitale vervoer.
Die vragmotorbestuurder is nie beseer nie en word oor die ongeluk ondervra.
Hy het nie gebruik gemaak van die spesiale “arrestor”-bedding wat langs Potgieterstraat geïnstalleer is, spesifiek vir wanneer bestuurders beheer oor vragmotors verloor, nie.
Potgieterstraat was berug vir vragmotors wat buite beheer geraak het, totdat dié bedding geïnstalleer is.
- Volg Nuus24 op Twitter
- SAPA