Seremonie lok verskeie godsdienste
2010-09-27 07:38
Johannesburg - Verskillende godsdiensgroepe het gister by die Nan Hua-tempel buite Bronkhorstspruit byeen gekom vir die jaarlikse seremonie van lig en vrede.
By dié Boeddhiste-tempel word die fees van lig en vrede die afgelope 12 jaar gehou, maar omdat talle monnike en nonne tot onlangs op ’n kongres in Taiwan was, is besluit om vanjaar slegs die seremonie by die tempel te hou.
Peter Just, of Tsegyal soos sy mede-Boeddhiste hom noem, het gesê die seremonie is relevant vir verskeie geloofsoortuiginge.
“Die seremonie word opgedra aan die welstand van die wêreld en word in die naam van wêreldvrede gehou.
“Lig of die vlam verteenwoordig, lewe, waarheid, verdraagsaamheid, aanvaarding en dit vier samesyn wat relevant is vir byna alle gelowe,” het Just gister gesê.
Verteenwoordigers van onder meer die Grieks-Ortodokse en Katolieke kerke, Hare Krisjna, Boeddhiste en Moslems het dit bygewoon.
Volgens vader Enrico Parry van die Suid-Afrikaanse Katolieke Biskopperaad is daar ’n behoefte om mekaar beter te leer ken en “dit is wat ’n geleentheid soos dié spesiaal maak”.
“Geloof is ’n baie basiese deel van die meeste kulture. Daar is deurlopend oorloë wat die wêreld teister.
"Dit is belangrik dat daar samesyn bewerkstellig word om die grense tussen mense af te breek om konflik op te los,” het Parry gesê.
- Beeld