Sensuswerkers in KZN staak
2011-10-31 21:58
Johannesburg – Sensuswerkers in Durban het Maandag gestaak en gekla hulle word minder as hul eweknieë in ander provinsies betaal.
Ongeveer 100 werkers het buite die Sensus-kantore in Durban se Samora Machelstraat gestaak en gedreig om ingevulde vraelyste te weerhou as gehoor nie aan hul eise gegee word nie.
Maandag was die laaste dag van die 21 dae lange optellingfase, wat die verspreiding van sowat 20 miljoen vraelyste ingesluit het.
Die stakende werkers moes hul ingevulde vraelyste Maandagaand indien.
Hulle het gesê hulle het in die media geleer dat hulle onderbetaal word.
“Ons kontrakte stipuleer dat ons R5 000 per week betaal word, maar verlede week het ons gesien veldwerkers in Johannesburg word R10 000 betaal en werkers in Pietermaritzburg word R7 500 betaal,” het ‘n staker, wat verkies het om anoniem te bly, gesê.
Die stakers beweer hulle is ver weg gestasioneer en moet meer geld uithaal vir vervoer.
“Ons word ook nie vergoed vir die lugtyd wat ons vir werk gebruik nie,” het die werker gesê.
Pali Lehohla, statistikus-generaal, het vroeër Maandag gesê die betaling van sensuswerkers begin op 10 November en sal ‘n geskatte R700 miljoen kos.
Optellers sal ‘n bedrag van R5 000 ontvang en hul toesighouers R7 000, het hy aan verslaggewers in Pretoria gesê.
- Volg Nuus24 op Twitter
- SAPA