Senior verkeersman vas ná ‘omkopery’
2010-03-10 09:07
Jodine Cloete
Kaapstad - ’n Senior verkeersbeampte wat na bewering omkoopgeld by ’n verkeersoortreder wou hê sodat hy nie ’n boete vir hom uitskryf nie, is Dinsdag in hegtenis geneem en sal vandag in op aanklag van korrupsie in die hof verskyn.
Die beampte is by die Hillstar-verkeersdepartement in Ottery in hegtenis geneem.
Die verdagte het glo R160 van die verkeersoortreder gevra en het die man daarna na ’n kitsbank geneem om die kontant te trek.
Die man het die voorval by die polisie aangemeld en ondersoek is ingestel.
Die verdagte is tans in aanhouding by die Bellville-polisiestasie en sal vandag in die Wynbergse landdroshof verskyn.
Volgens Richard Bosman, uitvoerende direkteur van die stad se afdeling vir veiligheid en sekuriteit, kan hulle nie bekend maak waar die voorval plaasgevind het nie omdat dit die ondersoek kan belemmer.
Hy het bygevoeg dat dit die tweede geval vanjaar is “waar ’n verkeersbeampte sy posisie misbruik en daarna vervolg word”.
J.P. Smith, Kaapstadse burgemeesterskomiteelid vir veiligheid en sekuriteit, het gesê beamptes wat hulle aan korrupsie skuldig maak, gee die diens ’n slegte naam.
“Verkeersbeamptes moet besef hulle gaan uitgevang word. Hulle moet ook weet dat daar ernstige stappe teen hulle gedoen sal word.”
Speurders van die Valke en die Stad Kaapstad se afdeling vir veiligheid en sekuriteit het die voorval ondersoek.
- Die Burger