Senior Cope-lede verwag glo ‘tweede Polokwane’
2010-05-21 09:15
Kaapstad - Cope se nasionale leierskongres gaan voort – kom wat wil.
Só het die party se sekretaris-generaal, Charlotte Lobe, Donderdag in ’n sterk bewoorde brief aan partylede gesê.
Ná weke se bespiegeling of Cope uiteindelik sy kongres sal hou of nie, het Lobe rug styf gemaak. Veral Mosiuoa Lekota, partyleier, en Smuts Ngonyama, Cope se beleidshoof, het die afgelope week gesuggereer dat die party nie gereed is vir ’n nasionale leiersverkiesing nie.
Sy het gewaarsku dat daar “streng” teen ongedissiplineerde leiers opgetree sal word wat die party se naam in oneer bring.
Maar sommige senior partylede vrees dat ’n “tweede Polokwane” Cope se voorland is waar ondersteuners van Lekota uit sleutelposte gedryf sal word indien Mbhazima Shilowa tot partyleier verkies word. Boonop is daar sterk aanduidings dat ’n “gelyklopende” kongres gehou sal word deur ontevrede Cope-lede wat nie volgende week se nasionale kongres gaan bywoon nie.
Daar is ook bewerings dat ondersteuners van Shilowa ’n veldtog beplan om ontslae te raak van LP’s en LPP’s wat Lekota as leier ondersteun. JJ Tabane, Cope-woordvoerder, het dié aantyging egter heftig ontken. “Daar is nie sprake van so iets nie.”
Volgens hom is dit so dat Lekota-ondersteuners voorbrand maak dat hy tot parlementêre leier verkies moet word indien die huidige ampsbekleër, eerw. Mvume Dandala, tot sekretaris-generaal verkies word. Dandala is die Shilowa-groep se voorkeurkandidaat vir die pos van sekretaris-generaal.
Intussen is ’n gesamentlike verklaring Donderdag deur Cope se provinsies, jeug- en vrouebewegings uitgereik waarin hulle verklaar dat hulle die voorgenome kongres ondersteun en dat Shilowa hul voorkeurkandidaat vir partyleier is.
- Die Burger