Senior ANC-lid deur eks vermoor
2011-08-29 22:57
Pretoria – ‘n Senior lid van die ANC is Maandag naby Pretoria doodgesteek, na bewering deur haar jaloerse eks-kêrel, het die polisie in Gauteng gesê.
Elsie Mahlangu (51) het omstreeks 14:00 by haar huis ontspan toe haar eks-kêrel ingestorm het, het Johannes Jafta, woordvoerder van die polisie in Cullinan, gesê.
‘n Heftige stryery het tussen die twee ontstaan, waartydens die man ‘n mes uitgehaal en Mahlangu na bewering herhaaldelik in die bolyf gesteek het.
Volgens Jafta het die aanvaller, wat in sy mid-40’s is, die huis aan die brand gesteek en weggehardloop.
“Haar bure het rook by die vensters sien uitkom en na die erf gehardloop,” het hy gesê.
“Hulle het emmers water gebruik om die brand te blus voordat hulle Mahlangu se verkoolde lyk op die vloer gevind het.”
Volgens Jafta was Mahlangu die ANC-tesourier in Wyk 99, Tshwane.
“Die motief vir die aanval is nie bekend nie, maar volgens gerugte wat ons gehoor het, het Mahlangu weke gelede met die man opgebreek, maar hy wou dit nie aanvaar nie,” het Jafta gesê.
Die ANC in Tshwane kon nie onmiddellik vir kommentaar bereik word nie.
- Volg Nuus24 op Twitter
- SAPA