Semenya gaan tóg eksamen skryf
2009-10-16 09:27
Johannesburg - Caster Semenya is gereed om haar universiteitseksamens af te lê, ten spyte van die debakel rondom haar geslag.
Die kampioen-atleet het Vrydag aan die Sowetan gesê sy is gereed om haar eerstejaar eksamen te skryf.
Semenya verkeer onder groot druk sedert 'n storm rondom haar geslag ná die Wêreldatletiekbyeenkoms in Berlyn in Augustus uitgebreek het.
Sy studeer sportwetenskap by die Universiteit Pretoria.
Die atleet het ook gereageer op 'n berig wat Dinsdag in Beeld gepubliseer is.
Volgens die berig het Semenya aan die universiteit gesê sy kan nie eksamen skryf nie.
"Ek het geen idee waarvan jy praat nie, man," het Semenya gesê. "Miskien moet jy eerder die persoon wat aangehaal is, vra."
"Ek het hard gestudeer, en is gereed vir my eksamens."
- Sapa