Semenya fokus op studies
2009-10-04 15:37
Caster Semenya was die naweek hard aan die studeer vir haar eerste eksamenvraestel wat môre geskryf word.
Sy was glo ook onbewus daarvan dat mnr. Julius Malema, ANC-jeugligaleier, Vrydag haar ouers in haar tuisdorpie Ga-Masehlong buite Polokwane besoek het om vir hulle kruideniersware te gee én bouplanne vir ’n splinternuwe drieslaapkamerhuis.
Mnr. Michael Seme, Semenya se afrigter, het gister aan Rapport gesê die 800m-wêreldkampioen fokus nou op haar studies. Sy het ook nie gister se vergadering van atlete in Pretoria bygewoon nie.
Semenya is deur Rapport gesien toe sy en ’n vriendin by die gebou uitgestap het waarin haar koshuiskamer is, ook die lokaal waar die atlete vergader het.
“Ek het vir Caster gesê sy moet in haar koshuiskamer bly en studeer,” sê Seme. “Sy doen haar bes met haar studies en ons help haar.”
Volgens hom is sy “oukei” onder die omstandighede. “Sy probeer net om al die dinge te vermy.”
Sy vermy ook al die publisiteit en mense wat politieke gewin hieruit wil put. “Sy luister nie na al daardie stories nie. Sy wil met niemand praat nie.”
Seme het gesê Semenya oefen ook gereeld en berei haar nou voor vir ’n wedloop einde Oktober.
- Rapport