Selfoondief verdrink by Gay Pride-parade

2012-10-08 14:25

Johannesburg – ‘n Vermeende selfoondief het die naweek in die Dieretuinmeer in die stad verdrink terwyl hy probeer het om weg te hardloop, het die polisie gesê.

“Dis moontlik dat hy ‘n veiligheidswag was wat by die Dieretuinmeer gewerk het, maar ons weet nog nie vir seker nie,” het lt.kol. Lungelo Dlamini gesê.

“Ons vermoed ook dat hy dronk kon wees, maar kan dit nie in hierdie stadium bevestig nie.”

Die man het ‘n vrou naby die parkeerterrein van die Dieretuinmeer gedreig en haar selfoon gesteel. Die voorval het Saterdag – die dag van die Gay Pride-parade – plaasgevind.

Sy het ‘n verbyganger gevra om haar te help en toe op die dief afgekom terwyl hy haar selfoon gebruik het.

“Hy het paniekerig geraak toe hy hulle sien en het die foon laat val...” het die polisiewoordvoerder gesê.

Dlamini sê die boef het toe in die meer gespring en “verdwyn.”

Daarna is die saak by die Parktown-polisie aangemeld.

Die dief se lyk is Sondag gevind toe die polisieduikers 'n soektog van stapel gestuur het.

Die man, wat tussen die ouderdom van 30 en 40 was, is nog nie geïdentifiseer nie.

Volg Nuus24 op Twitter 

- SAPA