Selebi terug in hospitaal

2012-08-02 16:32

Johannesburg – Die voormalige polisiekommissaris, Jackie Selebi, is weer in ’n hospitaal opgeneem, het die departement van korrektiewe dienste Donderdag gesê.

James Smalberger, adjunkkommissaris, het gesê Selebi is Dinsdag opgeneem en is sedertdien in die hospitaal.

Hy het gesê hy kan nie die naam van die hospitaal waar Selebi opgeneem is bekendmaak of oor sy gesondheidstoestand kommentaar lewer nie.

Ernest Kenoshi, die hoof- uitvoerende beampte by die Steve Biko-Akademiese Hospitaal, het gesê Selebi is nie meer ’n pasiënt by die hospitaal nie.

Adri Opperman, woordvoerder van Jakaranda-hospitaal, het ook geweier om kommentaar te lewer. Sy het gesê die hospitaal verskaf nie inligting oor sy pasiënte nie.

Selebi is twee weke gelede op mediese parool vrygelaat en onder huisarres geplaas. Hy is in 2010 aan korrupsie skuldig bevind en tot 15 jaar gevangenisstraf gevonnis.

– Volg Nuus24 op Twitter.
 

- SAPA