Selebi 'te siek' om hospitaal te verlaat
2011-12-23 15:00
Pretoria – Jackie Selebi, die veroordeelde voormalige nasionale polisiehoof, is te siek om uit die hospitaal ontslaan te word, het Tom Moyane, nasionale kommissaris van korrektiewe dienste, Vrydag gesê.
Moyane het gesê die departement is deur dokters by die Steve Biko Akademiese Hospitaal in Pretoria ingelig dat Selebi weens sy toestand nie ontslaan kan word nie.
Moyane en lede van die departement se uitvoerende bestuurspan het dié nuus ontvang van dokters wat Selebi behandel.
"Mnr. Selebi sal steeds behandeling by die hospitaal ontvang en die erns van sy toestand laat nie toe dat hy na die Pretoria-Sentraal-gevangenis geneem kan word om sy vonnis uit te dien nie."
'n Gesamentlike mediakonferensie oor Selebi se gesondheid sal nou op 28 Desember deur 'n span dokters, Selebi se
familie en die departement van korrektiewe dienste gehou word.
Die departement het gesê Selebi word vir "nier-verwante probleme" behandel.
Selebi het op 5 Desember by die tronk aangemeld om sy vonnis van 15 jaar te begin uitdien. Hy is skuldig bevind aan korrupsie nadat hy geld van die veroordeelde dwelmhandelaar Glenn Agliotti ontvang het en ‘n Britse dwelmondersoek-verslag aan Agliotti gewys het.
– Volg Nuus24 op Twitter
- SAPA