Selebi-saak kos belastingbetaler R14 milj.
2010-06-16 09:03
Lizel Steenkamp
Kaapstad - Jackie Selebi, oudpolisiehoof, sal die miljoene rande wat die staat aan sy regskoste bestee moet terugbetaal as hy op 1 Julie skuldig bevind word.
Beslis regter Meyer Joffe van die Suid-Gautengse hooggeregshof in Johannesburg egter in Selebi se guns, sal belastingbetalers verantwoordelik wees vir die volle rekening.
Tlali Tlali, woordvoerder van die departement van justisie, het Dinsdag gesê enigeen wat vir die staat gewerk het toe hy aangekla is en wie se regskoste in ’n strafregtelike saak deur die staat betaal word, “sal verantwoordelik gehou word vir die geld wat aan sy verdediging bestee is sou hy skuldig bevind word”.
Nathi Mthethwa, minister van polisie, het gister in antwoord op ’n parlementêre vraag van Pieter Groenewald (VF+) bevestig Selebi se regskoste het sedert Desember tot byna R14 miljoen verdubbel.
Dít is die bedrag wat belastingbetalers al sedert Desember 2007 opgedok het vir die regspan wat Selebi op aanklagte van korrupsie en regsverydeling verdedig. Boonop is die einde nie in sig nie.
Die R14 491 383 is egter net tot 31 Maart vanjaar en hulle verwag nog rekeninge.
Die staat en die verdediging het hul betoë verlede Donderdag in die hof afgesluit. Joffe sal op 1 Julie uitspraak lewer.
Dr. Pieter Mulder, VF+-leier, het gister gesê die vetste rekeninge “kom nog” omdat Selebi se verhoor eers in April hervat is. “Advokate (soos Cilliers) vra duisende rande per dag om in die hof te verskyn.”
Selebi het in Desember 2007 spesiale verlof geneem en hy het op 1 Februarie 2008 vir die eerste keer in die Randburgse landdroshof verskyn.
Sy kontrak as polisiehoof het eers op 31 Julie verlede jaar verstryk. Sy regskoste het toe reeds R6,9 miljoen beloop. Dit het binne ses maande met nog R500 000 tot R7,4 miljoen geklim.
* Mthethwa het in antwoord op ’n afsonderlike parlementêre vraag van die DA gesê 22 polisielede word die afgelope drie maande tot R873 000 betaal terwyl hulle tuis sit. Die beamptes is weens wangedrag geskors en ontvang hul salarisse hangende die uitkoms van tugverhore.
- Die Burger