Selebi nog te siek vir oorplasing
2011-12-12 09:35
Pretoria – Die oudpolisiehoof Jackie Selebi sal na die Johannesburgse gevangenis, ook bekend as “Sun City”, oorgeplaas word sodra sy toestand stabiliseer.
Sibongile Promise Khumalo, nasionale woordvoerder van korrektiewe dienste, het Sondag bevestig die voormalige kommissaris is steeds in die Pretoria-Sentraal-gevangenis se hospitaalafdeling.
Dit volg op berigte dat Selebi te siek is om na die Johannesburgse gevangenis vervoer te kan word.
Khumalo wou nie uitwei oor sy gesondheid of wat Selebi makeer nie. Sy het gesê sy familie het opnuut versoek dat sy privaatheid gerespekteer word.
“Maar ek kan wel sê hy is oukei.
“Hy is nie ’n veiligheidsrisiko vir ander soos daar in die media berig is nie. Hy is bloot ’n man wat probeer veg om sy lewe.”
Khumalo het bygevoeg Selebi was volgens sy regspan nie geskik om vervoer te kan word nie.
Selebi het ineengestort nadat hy gehoor het sy appèl teen sy tronkstraf van 15 jaar het misluk. Hy is na die Jakaranda-hospitaal in Pretoria geneem.
Sy regspan het in ’n poging om hom in dié private hospitaal te hou, hom tot die hof en die nasionale vervolgingsgesag gewend. Die Johannesburgse hooggeregshof het ’n lasbrief vir sy opname in die Johannesburgse gevangenis goedgekeur.
– Volg Nuus24 op Twitter
- Beeld