Selebi kry glo voorkeurbehandeling
2012-07-25 09:03
Johannesburg – Die voormalige polisiehoof Jackie Selebi ontvang dialise by ‘n staatshospitaal in Pretoria, terwyl ‘n vrou, wat terminaal siek is, weggewys is.
The Times het Woensdag berig daar is aan Suzette Janse van Rensburg gesê sy het ‘n maand oor om te lewe en sy sou dood gewees het as haar familie nie R66 000 betaal het vir die nierbehandeling by ‘n privaat hospitaal nie.
Haar skoonseun, Martin Kriel, het sy skok uitgespreek oor die nuus dat Selebi by die Steve Biko- Akademiese Hospitaal behandel word, terwyl 82 ander pasiënte op die waglys vir dialise is.
“Hoekom kry hy beter behandeling as my ma of enigiemand anders wat in dieselfde bootjie is?”
Janse van Rensburg, wat aan chroniese nierversaking ly, het die Charlotte Maxeke-hospitaal genader vir dialise, maar daar is aan haar gesê daar is 10 pasiënte voor haar op die waglys.
Sy sou slegs kon opskuif op die lys as ander pasiënte sou sterf of nieroorplantings kry.
“Ek was hartseer en depressief omdat die staat niks vir my kon doen nie,” het Janse van Rensburg gesê.
Selebi, wat skuldig bevind is aan korrupsie, is Vrydag mediese parool toegestaan.
– Volg Nuus24 op Twitter
- SAPA
