Selebi is skuldig
2010-07-02 12:27
Johannesburg – Jackie Selebi, voormalige polisiekommisaris, is Vrydag in die Suid-Gautengse hooggeregshof skuldig bevind aan korrupsie.
Selebi het klagtes van korrupsie en regsverydeling in verband met sowat R1,2 miljoen in die gesig gestaar wat hy glo van verskeie mense gekry het in ruil vir gunste.
Hy is skuldig bevind op aanklagte van korrupsie, maar onskuldig op aanklagte van regsverydeling.
Selebi het skuld ontken.
Regter Meyer Joffe het bevind dat die staat bó alle twyfel bewys het dat Selebi betalings en geskenke vanaf Glen Agliotti ontvang het.
Joffe het gesê in die meeste gevalle waartydens die staat se hoofgetuie, Agliotti, beweer het dat betalings aan Selebi gemaak is, ander getuies dit kon bevestig.
"Jackie Selebi het sy getuienis tot sy voordeel probeer aanpas, en op dié manier sy geloofwaardigheid ingeboet," het Joffe bevind.
Selebi se bewering dat daar 'n sameswering teen hom beplan was, is verwerp.
Die staat het 17 getuies geroep en die verdediging ses.
Selebi is uit op waarskuwing, en sal op 14 Julie gevonnis word.
- Volg Nuus24 op Twitter.