Selebi ‘is baie siek’
2011-12-13 07:23
Johannesburg – Die voormalige polisiekommissaris, Jackie Selebi, is Maandagoggend in die Steve Biko-staatshospitaal in Pretoria vir verdere behandeling opgeneem.
Na verneem word, sluit dié behandeling ook dialise in.
Sibongile Promise Khumalo, woordvoerder van korrektiewe dienste, het Maandag bevestig dat korrektiewedienste-beamptes die 61-jarige oudpolisiehoof na dié hospitaal geneem het.
“Hy sal vir ongeveer twee dae daar bly vir waarneming en behandeling. Daarna sal hy reguit teruggebring word na die Pretoria-Sentraal-gevangenis se hospitaalafdeling,” het sy gesê.
Sy kon steeds nie uitwei oor wat Selebi makeer of watter behandeling hy ontvang nie, behalwe om te sê: “Hy is ’n baie siek man.”
Sy familie het versoek dat geen private inligting oor sy gesondheid verskaf word nie.
Volgens Khumalo het nie Selebi of sy regspan versoek dat hy in ’n private hospitaal opgeneem word nie.
Hy word deur korrektiewe beamptes in die hospitaal bewaak.
Selebi is reeds sedert verlede week Maandag, die dag waarop hy sy 15 jaar gevangenisstraf moes begin uitdien, in die tronkhospitaal.
Dit het gekom nadat hy op 2 Desember in sy Waterkloofrif-huis ineengestort het kort nadat die appèlhof in Bloemfontein sy appèl afgekeur het.
Selebi is daardie Vrydag eers per ambulans na die Jakaranda-hospitaal geneem voordat hy die Maandag na die gevangenis se hospitaal geskuif is.
Sy regspan het hulle daardie Maandag tot die hof en die nasionale vervolgingsgesag gewend in ’n poging om Selebi in die private hospitaal te hou.
Die Johannesburgse hooggeregshof het egter ’n lasbrief vir sy opname en aanhouding in die Johannesburgse gevangenis goedgekeur.
Selebi was glo te siek om na Johannesburg te reis of vervoer te word en is later daardie middag per rolstoel uit die Jakaranda-hospitaal geneem en in die tronkhospitaal in Pretoria opgeneem.
Khumalo het vroeër gesê hy sal na die Johannesburgse gevangenis oorgeplaas word sodra sy toestand stabiliseer.
- Beeld