Sekuriteitswag in hof oor aanranding by Goodman-galery
2012-06-29 15:26
Johannesburg – ‘n Sekuriteitswag van die Goodman-galery wat daarvan beskuldig word dat hy ‘n man aangerand het wat The Spear-skildery geskend het, het Vrydag in die Hillbrow-landdroshof verskyn.
Die saak is uitgestel en Paul Molesiwa van Core Tactical, ‘n privaat sekuriteitsmaatskappy, sal op 7 September weer in die hof verskyn.
Die aanklaer, Thabang Motloung, het aan landdros, Nsizwa Shabangu, gesê uitstel is gegee om voorsiening te maak vir die kontak van ander getuies, en sodat die klaer se verklaring weer geneem kan word.
Molesiwa se borgtogperiode is verleng. Hy het die hof spoedig saam met ‘n kollega verlaat en nie een van hulle het vrae beantwoord nie.
Hy word daarvan aangekla dat hy Louis Mabokela aangerand het nadat laasgenoemde die kunstenaar Brett Murray se skildery, The Spear, waarin pres. Jacob Zuma met sy geslagsdele ontbloot geskilder is, op 22 Mei geskend het.
Mabokela en Barend la Grange, wat beide Donderdag in die hof verskyn het vir vermeende saakbeskadiging, het bo-oor Murray se skildery geverf.
Dit is toe dat Molesiwa ingetree het.
‘n Vierde man, George Moyo, is op dieselfde dag in hegtenis geneem nadat hy glo die letters “res” op die buitenste muur van die galery gespuitverf het. Hy is ook op borgtog vrygelaat.
– Volg Nuus24 op Twitter
- SAPA
