Sekswerker se kind glo Naas is sy pa
2009-10-25 12:02
Kaapstad - ’n Jong Kaapse man het ’n hartstogtelike verlange om uit te vind of die legendariese Springbok-rugbyspeler Naas Botha sy biologiese pa is.
Van sy kinderdae is vir hom gesê Naas is sy biologiese pa.
Morné Redmond (27), van Kensington in Kaapstad, sê hy is op 18 Januarie 1982 gebore.
Hy’s glo verwek tydens ’n nag van passie in ’n Nuwelandse hotel in die vroeë 1980’s tussen sy ma – toe ’n sekswerker – en Botha, wat toe vir die Bokke gespeel het.
“Almal praat dat hy my pa is.”
Botha het gistermiddag aan Rapport gesê: “Dit is ’n wolhaarstorie. Ek het geen idee waarvan jy praat nie. Ek dink die storie is ’n bietjie far-fetched.”
Toe Rapport hom inlig die biologiese ma was destyds ’n sekswerker, het hy gesê: “Ek belowe jou, ek sal nooit so iets in my lewe doen nie. Ek is 100% seker. Ek was mos oud genoeg om so iets te weet.”
Toe hy hoor die sekswerker is bruin, het hy gesê: “O, jinne, as jy nou só iets op die tafel sit, is daar nou ’n 110%- kans dat ek nié so iets sou doen nie.”
Redmond, ’n ambagsman, sê: “Ek glo ’n DNS-toets is die enigste manier hoe ’n mens presies kan weet of Naas my pa is of nie.
“My ma kon nooit ’n definitiewe antwoord gee nie. Die vraag maal nog altyd in my kop. Ek is nie so sportief soos hy nie, maar is goed met my hande.”
Sy biologiese ma, Denise Redmond (51), het in drie gesprekke met Rapport herhaaldelik ontken dat Botha haar seun se pa is.
In haar eerste gesprek het sy ontken dat sy ooit intiem met Botha was, maar in ’n tweede gesprek het sy dit wel erken, berig Marlene Malan.
“Morné se pa is ’n Duitse sakeman en hy is lankal uit die land uit. Hy was baie ouer as ek; seker al dood.
“Ja, ek hét een keer by Naas geslaap, net een keer. Maar toe was ek al swanger met Morné.
“Ek was nog jonk, so diep in die 20. Naas was ook in die 20. Hy en ander Springbokke het in die Newlands-hotel (naby Nuweland) gebly toe ’n oorsese rugbyspan hier kom speel het. Ons groepie meisies was ook daar.
“In daardie tyd het ons nog nie goed soos kondome geken nie.”
Cynthia Peacock, wat Morné grootgemaak het vandat hy twee jaar oud was, sê Redmond het haar vertel “Naas is die kind se pa”.
Twee destydse vriendinne beaam dit. Een, bekend as Christine, sê sy en Redmond het destyds saamgewoon.
“Sy het die volgende oggend nog kom spog sy was die vorige aand saam met Naas en dat hy nie ’n kondoom wou gebruik nie.”
Sy sê Redmond swyg al jare hieroor, omdat “sy skaam is omdat Naas ’n high-profile celebrity was”.
’n Ander vriendin het ook die gebeure bevestig.
–Rapport
Vir meer hieroor, besoek Rapport