Sekssaak: Skuldige ontglip tronk steeds
2010-09-19 12:56
Kaapstad - Twaalf jaar lank het die ortopeed dr. Johannes Albertus Roux Volsteedt
(63) – voorheen van Bellville, toe van Witbank, deesdae van Durbanville –
daarin geslaag om die paadjie tronk toe te fnuik.
Nou blyk dit
dieselfde paadjie van herhaalde verhoor-uitstelle word gevolg nadat die
derde datum sedert Maart vanjaar vir sy vonnisoplegging in die
Bellville-landdroshof vasgestel is.
Nadat Volsteedt op 26 Maart
vanjaar uiteindelik, ná ’n verhoor wat een klag van verkragting en 16
van onsedelike aanranding ingesluit het, aan al dié misdrywe skuldig
bevind is, kon die staat hom steeds nie vaspen vir vonnisoplegging nie.
Die
eerste klag, dié van verkragting, is in 1999 teen hom aanhangig gemaak.
Daarna het nog tien vroue 16 klagte van onsedelike aanranding teen hom
gelê. Sommige dateer van 1978.
Dit maak die Volsteedt-verhoor een
van die langste sake van verkragting en onsedelike aanranding in die
Suid-Afrikaanse regsgeskiedenis.
Die 11 Kaapse vroue het met sy
skuldigbevinding hul verligting uitgespreek dat Volsteedt se perverse
seksuele praktyke uiteindelik aan die kaak gestel is.
Veral die
verkragtingslagoffer, Vida Engelbrecht van Grassy Park, het gesê sy
is bly dat die hof haar geglo het: Dit is dat sy op Volsteedt se
ondersoekbedjie verkrag is en dat sy nie, soos hy aangevoer het,
vrywillig met hom seks gehad het nie.
Intussen het drie Gautengse vroue ook klagte van onsedelike aanranding teen hom ingedien.
Dit dateer van 2006.
Dié
saak duur voort, terwyl die 11 Kaapse slagoffers wéér herhaaldelik
teleurgesteld voor die hofdeure moes omdraai omdat Volsteedt nou glo ’n
“degeneratiewe breintoestand” ontwikkel het.
Dié beweerde siekte was nog nie voor 26 Maart vanjaar in die hof ter sprake nie.
Sy regsverteenwoordiger, adv. Graeme van der Spuy, het op die eerste vonnisdag, 14 Junie, dié breintoestand aangevoer.
Die
saak is hangende mediese ondersoeke tot verlede Maandag, 13 September,
uitgestel. Maar op dié dag het Van der Spuy gesê die mediese verslae oor
Volsteedt is nog nie voltooi nie. Regter André la Grange het die
vonnisdag nou tot 15 Oktober uitgestel.
Die minimum vonnis vir verkragting is tien jaar tronkstraf.
Van der Spuy het teenoor Rapport bevestig ’n “degeneratiewe breintoestand” by Volsteedt word ondersoek.
Adv.
Esna Erasmus, wat die saak namens die staat vir die Kaapse vroue gedryf
het, het gesê: “Ek is gereed vir vonnisverrigtinge. Die saak is op die
versoek van die verdediging uitgestel. Wat is die kans dat dit nog tien
jaar gaan duur?”
- Rapport