Seksnetwerk: Meisies glo met Mxit ontbied
2011-10-20 07:00
Oudtshoorn – Indien die bewerings waar is, moet ten sterkste opgetree word teen polisiemanne wat daarvan verdink word dat hulle seksuele omgang met minderjarige meisies gehad het. Só het Dan Plato, Wes-Kaapse minister van gemeenskapsveiligheid, Woensdag gesê.
Plato het gereageer op die inhegtenisneming van twee polisiebeamptes van die polisiekantoor op Nelspoort in verband met die beweerde seksuele misbruik en statutêre verkragting van minstens vier meisies van 14 en 15 jaar oud op dié Karoo-dorpie.
Gerugte dat ’n derde polisieman glo nog nie in hegtenis geneem is nie omdat hy gewapen is, kon nie bevestig word nie.
Nog drie mans, werknemers van Mkhulu-kontrakteurs, is ook in hegtenis geneem. Hulle verskyn vandag in die Beaufort-Wes-landdroshof.
Luidens verklarings wat deur die meisies afgelê is, het die polisiebeamptes hulle glo met Mxit na die polisiekantoor ontbied en in die aanklagkantoor seksueel met hulle verkeer.
’n Ma wat daarvan te hore gekom het, het dit aangemeld by Una Wentzel van Molo Songololo, ’n kinderbeskermingsorganisasie, waarna ’n ondersoek gedoen is.
Die ondersoek duur voort en na verwagting kan nog meisies na vore kom en nog mans betrek word.
“Dit is nie ’n uitgemaakte saak dat die meisies se ouers geweet het waarmee hul dogters besig is nie,” het die voorsitter van die gemeenskapspolisiëringsforum op Beaufort-Wes, Andrew Lyon, Woensdag gesê.
“Met Mxit en Facebook wat algemeen beskikbaar is op selfone – en elke kind het een – is dit vir ouers moeilik om te weet met wie hul kinders kommunikeer. Hulle sien maar net die selfoon se liggie flits onophoudelik.
“Hierdie kommunikasiemiddels is ’n maklike manier om ’n jong meisie uit te buit.
“En as ’n man eers haar vertroue gewen het, is dit maklik om haar verder te verlei. As die saadjie eers geplant is, kan daar ’n enorme onheilsboom groei.
“Teen die tyd dat die ouers agterkom iets skort, is die meisies al baie diep in die seksweb vasgevang.”
Lyon is van mening dat kinderregte ook die ouers daarvan weerhou om op te tree.
“Die regering gaan roekeloos om met wetgewing. Ek glo nog in orde en dissipline, maar kinders dreig deesdae die ouers as die ouers in hul lewe wil ingryp.”
Volgens Plato word meisies veral in landelike gebiede uitgebuit. “Ek was drie weke gelede by ’n hoërskool op die platteland waar 30 skoolmeisies swanger is.
“Daar is geen opbouende aktiwiteite vir jong mense om hulle mee besig te hou nie.”
– Volg Nuus24 op Twitter
- Die Burger