Weermag bevestig seksklagte teen senior bevelvoerder
2011-06-29 09:04
Johannesburg – Vier klagte van seksuele vergrype deur ’n senior bevelvoerder word ondersoek, het die weermag Dinsdag bevestig.
Die saak is Maandagmiddag by die Militêre Polisie in Wynberg, Kaapstad, deur vier vrouesoldate van die weermag se skool vir logistieke opleiding by Youngsfield in Kaapstad ingedien.
Hulle beweer lt.kol. Rodney Hine, die skool se waarnemende bevelvoerder, het hom glo aan dié vergrype skuldig gemaak toe hy Donderdagaand laat in hul woonkwartier ingekom het.
Die vroue – drie diensvrywilligers wat nog nie 21 jaar oud is nie en ’n sersant – werk by die skool waar diensvrywilligers gewoonlik opgelei word.
Volgens ingeligtes was daar al maande lank ’n toenemende voorkoms van seksuele teistering van die vrouestudente.
Van die instrukteurs het selfs al openlik verhoudings met die vroue aangeknoop.
Van hulle is al weens dié beweerde vergrype verplaas, maar ’n vorige bevelvoerder het hom glo ondanks dié verplasings sélf skuldig daaraan gemaak.
Die meeste van dié klagte is nooit behoorlik ondersoek nie omdat die jong diensvrywilligers intimidasie vrees en bang is hul tweejaardienskontrakte word nie hernu nie as hulle sou kla.
In die klagte wat vandeesweek ingedien is, noem die vroue dat hulle dit wil laat boekstaaf dat hulle vrees hulle gaan geïntimideer of geviktimiseer word solank hulle voortgaan om elke dag saam met Hine te werk.
Dit is onbekend of hy vir die duur van die ondersoek verplaas gaan word, het kol. Petrus Mothlabane, woordvoerder van die weermag, gesê.
Na verneem word, is Hine Donderdagaand glo in die kroeg by die skool gesien.
Die meisies was teen 22:00 reeds aan die slaap toe hulle blykbaar wakker geword het met Hine wat in die rondawel was.
Hy is vervolgens na nóg ’n rondawel waar die sersant geslaap het.
Volgens ooggetuies het hy na drank geruik en was die vroue erg getraumatiseer ná die voorval.
Hine is getroud.
Mothlabane het Dinsdag gesê die departement van verdediging beskou die saak in ’n baie ernstige lig, maar dat die reg nou sy gang moet gaan.
– Volg Nuus24 op Twitter
- Beeld