‘Seks vir ’n HOP-huis’
2011-11-23 08:03
Bloemfontein – 'n Raadslid van die Mangaung-metroraad word daarvan beskuldig dat hy seksuele gunsies vir munisipale dienste eis.
Xolo Pongolo, raadslid vir wyk 3, moet nou inwoners wat keelvol is vir sy beweerde onetiese werkwyse in die oë kyk.
Boniswa Mosese, een van sy beweerde slagoffers, het aan Volksblad gesê hy het geweier om haar naam op die waglys vir ’n HOP-huis te sit as sy nie met hom in die bed spring nie. “Hy wou seks hê in ruil vir ’n HOP-huis.”
Mosese is een van vele vroue wat glo gewaarsku is dat hulle teenprestasies sal moet lewer as hulle dienste van die regering verlang wat hulle gratis toekom.
Nóg ’n beweerde slagoffer – haar naam is aan Volksblad bekend – het in ’n onderhoud gesê Pongolo het probeer om met haar seks te hê voordat hy ’n rioolpyp sou herstel wat rou riool in haar erf gepomp het.
“Toe ek geweier het om met hom seks te hê, is die pyp nooit herstel nie.”
Pongolo word deur die inwoners met pres. Robert Mugabe van Zimbabwe vergelyk, omdat hy weier om te bedank.
Die inwoners sê hulle is keelvol. Hulle dreig om volgende week na die kantoor van premier Ace Magashule op te ruk en te eis dat Pongolo uitgeskop word.
Pongolo het gister die bewerings teen hom heftig ontken en gesê hy ken Mosese nie. Hy het ook nooit seks vir dienste geëis nie.
“Dit is ’n politieke smeerveldtog,” het hy gesê.
Pongolo word ook daarvan beskuldig dat hy sowat 15 HOP-huise in Kagiso Square vir R700 tot R800 per maand verhuur.
Pongolo, lid van die burgemeesterskomitee belas met menslike vestiging, ontken dit ook. Volgens hom hanteer die provinsiale departement die toekenning van huise.
’n Inwoner van een van die huise wat te bang is om haar naam te noem, het aan Volksblad gesê Pongolo se gesant kollekteer elke maand die huurgeld van haar.
Pongolo het verlede week na bewering ook ’n inwoner aangerand wat na sy kantoor opgeruk het om te kla. Hy het ook glo ’n vuurwapen op die mense gerig.
Hoewel Pongolo ontken dat hy sy vuurwapen op mense gerig het, het hy gesê hy het ’n klag van aanranding ingedien teen ’n inwoner wat hom aangeval het.
Kapt. Rulene Kuhn van die polisie het bevestig ’n klag van die rig van ’n vuurwapen word teen Pongolo ondersoek.
– Volg Nuus24 op Twitter.
- Volksblad